ပိုက်ဆံမကုန်အောင်သုံးနည်း
ပိုက်ဆံမကုန်အောင်သုံးချင်တယ်ဆိုရင် ဥပဒေသလေး တစ်ခုကိုပဲ လိုက်နာဖို့လိုတယ်။
ဒီဥပဒေသလေးကို ကျွန်တော်ကိုယ်တိုင် တီထွင်ထားတာဖြစ်ပြီး...
"ကြက်ကရတဲ့ အကျိုးအမြတ်ကိုမယူနဲ့ ကြက်ဥကရတဲ့ အကျိုးအမြတ်ကိုယူ"
လူတော်တော်များများ ပိုက်ဆံတွေ အဖတ်မတင်ဖြစ်နေတယ်၊ ဘယ်လောက်ပဲ ပိုက်ဆံရှာနိုင်ရှာနိုင် လောက်ငှတယ် မရှိဘူးဖြစ်နေရတယ်ဆိုတာဟာ..
မြင်သာအောင် ဥပမာပေးရရင်...
ကြက်ဥရောင်းလို့ရတဲ့ ပိုက်ဆံကို မသုံးပဲ ကြက်ရောင်းလို့ရတဲ့ ပိုက်ဆံကို သုံးမိနေတာကြောင့်ပဲ။
နည်းနည်းနားရှုပ်သွားလားမသိဘူး။ ပြန်ရှင်းပြပါမယ်။
ကျွန်တော်က တစ်လကို လစာငါးသိန်းရတဲ့ ဝန်ထမ်းတစ်ယောက်ပဲထားပါတော့။ အဲ့ဒီငါးသိန်းလုံးကို လတိုင်း တပြားမှမကျန်အောင် သုံးနေမယ်ဆိုရင် ဘာမှအဖတ်တင်မှာ မဟုတ်ဘူး။
ဒါပေမဲ့ အဲ့ဒီငါးသိန်းကို တစ်နေရာမှာ ရင်းနှီးမြုပ်နှံပြီး အဲ့ဒီကရတဲ့ အမြတ်အစွန်း တစ်သိန်းကိုပဲ သုံးမယ်ဆိုရင် ကျွန်တော့်ပိုက်ဆံ ငါးသိန်းလည်း မကုန်တော့တဲ့အပြင် ကျွန်တော်သုံးချင်တာတွေကိုလည်း စိတ်လွတ်ကိုယ်လွတ်နဲ့ နောက်လှည့်ကြည့်စရာမလိုဘဲ သုံးစွဲနိုင်လာမယ်။
ငါးသိန်းဆိုတာ ကြက်ကို ရည်ညွှန်းတာ ဖြစ်ပြီး၊ ငါးသိန်းရင်းနှီးပြီးတော့မှ ရတဲ့ အမြတ်ငွေ တစ်သိန်းဆိုတာ ကြက်ဥကို ရည်ညွှန်းတာပါ။
အဲ့တော့ ပိုက်ဆံမကုန်အောင် သုံးချင်တယ်ဆိုရင် ကြက်ကရတဲ့ အကျိုးအမြတ်ကို ယူလို့မရဘူး၊ ကြက်ဥက ရတဲ့ အကျိုးအမြတ်ကိုပဲ ယူမှရမယ်။
ဒါကြောင့် ပိုက်ဆံလျှော့မသွားဖို့အတွက်ဆိုရင် ကိုယ့်မှာ တစ်လကိုဝင်ငွေ နှစ်သိန်းပဲရှိရှိ၊ သုံးသိန်းပဲရှိရှိ ရှိတဲ့ဝင်ငွေကို အရင်းဦးဆုံး ရင်းနှီးမြုပ်နှံပြီးတော့မှ အဲ့ဒီကရတဲ့ အမြတ်အစွန်းကိုပဲ သုံးသင့်တယ်။
လွယ်တော့ မလွယ်ပါဘူး။ ခက်ခဲပါလိမ့်မယ်။ အစပိုင်းမှာ အသုံးစရိတ်မလောက်တဲ့ ပြဿနာတွေ၊ ဝယ်ချင်တာ မဝယ်ရ၊ စားချင်တာမစားရဘဲ စိတ်ကိုအောင့်အီးသည်းခံရတဲ့ ပြဿနာတွေ ကြုံတွေ့ရပါလိမ့်မယ်။ ဒါပေမဲ့ လက်မလျှော့ပါနဲ့။
အသုံးစရိတ်မလောက်တဲ့ ပြဿနာကို ကျွန်တော်အမြဲပြောပြောနေကျနည်းလမ်းဖြစ်တဲ့ "ပိုလည်းရှာပါ၊ လျှော့လည်းသုံးပါ" ဆိုတဲ့ နည်းလမ်းနဲ့ ဖြေရှင်းပါ။
ဒါဆို သင့်ပိုက်ဆံက မကုန်တော့တဲ့အပြင် တိုး၍ တိုး၍သာ လာပါလိမ့်မယ်။ ဒါကြောင့် နောက်တစ်ကြိမ် ပြန်ပြောပါမယ်။ ပိုက်ဆံမကုန်အောင်သုံးချင်တယ်ဆိုရင်..
"ကြက်ကရတဲ့ အကျိုးအမြတ်ကိုမယူပါနဲ့ ကြက်ဥကရတဲ့ အကျိုးအမြတ်ကိုယူပါ။"
Credit: Dr.Thet Htar Aung
Comments
Post a Comment