ကျွန်တော်တို့လင်မယားနှင့် အမေသုံးယောက်
ကျွန်တော်တို့လင်မယားနှင့် အမေသုံးယောက်
ကျွန်တော့်အသက် ၁၈ နှစ်အထိ အမေ၊ အဖေသည် တစ်စုံတွဲတည်း ရှိခဲ့သည်။ သို့သော် ကံကြမ္မာ အလှည့်အပြောင်းက ကျွန်တော့်ကို နောက်ထပ် အဖေ၊ အမေနှစ်စုံကို ထပ်ပြီးရစေသည်။ စစ်ကျောင်းဆင်းအပြီး မလေးနှင့် လက်ထပ်ခဲ့သဖြင့် မလေးကလည်း သူ့မိဘများအပြင် အဖေ၊ အမေ နောက်ထပ် သုံးစုံ အလိုအလျောက် ရလိုက်သည်။ ကျွန်တော်တို့ မိသားစုသည် အမေရင်း၊ အဖေရင်းကိုလည်း မိဘအဖြစ် အသိအမှတ်ပြုရသည်။ မွေးစား အဖေ၊ အမေကိုလည်း အမေအရင်း၊ အဖေအရင်းအဖြစ် ရှေ့တန်းတင်ရသည်။ ကိုတင်ထွန်း၏ မိဘများကိုလည်း ကျွန်တော်တို့၏ မိဘများအဖြစ်ပါ သဘောထားလိုက်သည်။ ထိုအခါ ကျွန်တော်တို့၏ မိသားစု လေးစုစလုံး ပေါင်းစည်းမိသွားသည်။
အတော်လေး မာနကြီးသော အမေဒေါ်သိန်းကြည်မှအပ ကျန်မိဘများသည် တော်တော်ကလေး ကူးလူးဆက်ဆံမှုရှိသည်။ မိဘများသာမက ဆွေမျိုးသားချင်းတွေကလည်း များလာသည်။ အမေဒေါ်မြသီ မွေးထားသော အစ်ကို၊ အစ်မများသည် ကျွန်တော်တို့ နှစ်ယောက်စလုံး၏ အစ်ကို၊ အစ်မများ ဖြစ်လာသည်။ ကိုတင်ထွန်း မိဘများမှ မွေးထားသော ညီ၊ ညီမများသည် ကျွန်တော်တို့၏ ညီ၊ ညီမများ ဖြစ်လာသည်။ မလေးကတော့ ထိုထိုသော မိဘများကြား၊ ညီအစ်ကို မောင်နှမများ အကြားတွင် ပေါင်းကူးတံတားကြီးသဖွယ် ဖြစ်လာသည်။ ကျွန်တော်တို့က ရန်ကုန်တွင် အနေများတော့ အားလုံးက အဝင်အထွက် ရှိသည်။ အားလုံးကို မလေးက ဒိုင်ခံ ဖြေရှင်းပေး၊ လုပ်ပေးရသည်။ အစောပိုင်းကာလတွေကဆိုလျှင် အမေဒေါ်သိန်းကြည်ကို စိတ်ပြေအောင် လုပ်ရသေးသည်။
ကျွန်တော်ကတော့ တပ်မတော်တွင် ငယ်နုစဉ်မှတစ်ပါး တပ်ရင်းမှူးမှစပြီး ရှမ်းပြည်တောင်ပိုင်းတွင် တာဝန်ကျတာ များလာသဖြင့် အမေဒေါ်ြမသီနှင့် မကြာခဏဆိုသလို တွေ့ဖြစ်သည်။ တပ်ရင်းမှူးဘဝကဆိုလျှင် တပ်သို့ အတက်အဆင်း၊ တိုင်းသို့ အဝင်အထွက်များတွင် အမေ့ထံဝင်၍ အိပ်သည်။ အမေ့ထံရောက်တိုင်း တစ်ညလုံး အိပ်ကြသည်မရှိ၊ စကားတွေ ပြောဖြစ်သည်။ ညအိပ်လျှင်ပင် ကျွန်တော်က အမေနှင့် ညအိပ်သည်။ နုစဉ်က အမေ့အပေါ်ထားခဲ့သော မကျေနပ်စိတ်တွေ လုံးဝမရှိတော့။ ကြက်ပျောက်ငှက်ပျောက် ပျောက်သွားပြီ ဖြစ်သည်။
ထိုအချိန်တွင် အမေ့အပေါ် ချစ်စိတ်သာမက အားကိုးစိတ်များပါ ဖြစ်ပေါ်လာဟန် ရှိသည်။ တွေ့တိုင်း တွေ့တိုင်း ရှေးဟောင်းနှောင်းဖြစ်များ ပြောကြသည်ထက် ထိုခေတ်ထိုအခါက နိုင်ငံရေးအခြေအနေများကို ပြောဖြစ်ကြသည်။
(မှတ်ချက်။ ။ ဤစာများအားလုံးကို (Myanmar Heritage) စာအုပ်တိုက်မှ (၂၀၁၄၊ ဇွန်လ) တွင် ပထမအကြိမ်ထုတ်ဝေသည့် စာရေးသူ မြင့်သူ၏ မမျှော်လင့်သောခရီးရှည် စာအုပ်မှ လေးစားစွာဖြင့် စာစီကူးယူဖော်ပြပါသည်။)
လေးစားစွာဖြင့်
ထူးအောင်ဝင့်
Comments
Post a Comment